Жанчына праходзіла недалёка ад былой крамы №50 (cёння “Еўраопт” на вуліцы Пагранічнай), яна ішла да родзічаў, дзе ў гэты момант былі яе дзеці. Дзяцей жанчына пакінула ненадоўга з-за справаў. Менавіта ў гэтым раёне на яе і напаў не вядомы ёй мужык.

Нападнік схапіў жанчыну за горла, прыдушыў і калі зразумеў, што тая не можа паўнавартасна супраціўляцца, пачаў яе збіваць і распранаць з відавочным намерам згвалціць.

Жанчыне пашанцавала, што недалёка ад месца здарэння праходзіў іншы мужчына, які крыкам і пагрозамі выклікаць міліцыю адцягнуў увагу гвалтаўніка на сябе. Гвалтаўнік перавёў увагу на абаронцу і гэта дапамагло ахвяры збегчы, але ўся агрэсія перакінулася на абаронцу.

Агрэсар збіваў новую ахвяру ўпарта і вельмі моцна, у хаду ішлі і рукі і ногі, некалькі моцных удараў нагамі па галаве... На шчасце, мужчына-абаронца сапраўды паспеў выклікаць міліцыю. Гвалтаўнік арыштаваны.

На сёняшні дзень жанчына адчувае сябе нармальна, хаця з-за пабояў знаходзіцца на бальнічным. Гвалтаўнік змешчаны пад варту. Найбольш дасталося абаронцу жанчыны. З чэрапна-мазгавой траўмай ён быў дастаўлены ў бальніцу імя Сямашкі і пасля трэпанацыі чэрапа да гэтае пары (здарэнне адбылося ў чацвер 4 верасня) знаходзіцца ў рэанімацыі ў цяжкім стане. Пагаршае праблему і тое, што з-за здарэння сям'я героя апынулася ў даволі складанай жыццёвай сітуацыі.