У публічнай базе дадзеных судовых пастановаў з'явіўся прысуд па арыгінальнай справе. Паводле міліцэйскага пратаколу, мужчына прыехаў у Оршу 6 кастрычніка і знаходзіўся ў "праходнай залі" чыгуначнага вакзалу. Ён прыцягнуў увагу людзей у пагонах тым, што было ў яго ў руках - распакаваная стрэльба. То бок, прыезжы гуляў па вакзале са зброяй у руках.
Праўда, стрэльба аказалася пнеўматычная, але ж усё адно, тое як мужчына яе трымаў не адпавядала закону пра зброю.
На суд мужчына не з'явіўся, але з пратаколам пагадзіўся і віну прызнаў. Магчыма, з-за прызнання віны, прысуд быў дастаткова лёгкі - 296 рублёў штрафу, нават, без канфіскацыі вінтоўкі.
