Не можам сказаць дакладна калі адбылоя само здарэнне, але суд у Оршы па апісваемым факце адбыўся яшчэ 6 лютага, а сёння ў адкрытым доступе з'явілася судовая пастанова па справе. Антыгерой гісторыі, ён жа падсудны мае вельмі насычаную біяграфію. Ён закаранелы рэцыдывіст. За сваё жыццё толькі па крымінальным кодэксе ён быў судзімы ажно 12 разоў! І кожны раз суды прыгаворвалі яго да ўмовых, або рэальных тэрмінаў. Калі ўсе прысуды скласці разам, то пад рознымі відамі пакарання ён павінен быў бы правесці агулам больш за 25 гадоў. Але чамусці мужчыне шмат шанцавала і некалькі разоў яго вызвалялі па амністыі.

Відавочна, што ні амністыі, ні адседжаныя тэрміны аніяк не выправілі рэцэдывіста. У час калі ён зноў быў пад прэвентыўным наглядам як раз і адбылося задрэнне. Мужчына прыйшоў да свайго ўчастковага адзначыцца, а потым "пайшоў гуляць па горадзе", як сам сказаў на судзе. Гуляў ён не зусім безмэтава: па дарозе купіў шкарпэткі. Як жа не абмыць такую пакупку і заадно мужчына набыў і бутэльку гарэлкі. І басцяючыся па горадзе час ад часу выпіваў. Знаходзячыся каля першай музычнай школы ён пабачыў стайку дзяцей, якія гулялі перад заняткамі ў гэтай школе. Потым ён апраўдваўся, што не памятае што адбылося і быў перакананы (прынамсі у паказаннях), што зрабіць такі ўчынак мог толькі выпадкова. А ўчынак палягаў у тым, што ён двойчы ўдарыў адну з дзяўчынак пакетам па галаве. А ў пакеце ляжала недапітая бутэлька. Таму ўдар хоць і прывёў толькі да сінякоў, але ж на дзіцячай галаве адчуваўся.

Як толькі маці дзяўчынкі даведалася пра здарэнне, то адразу звярнулася ў міліцыю. На судзе яна не патрэбавала аніякіх кампенсацыяў ні маральнай шкоды, ні фізічнай. Патрабавала толькі максімальна пакараць нападніка-рэцэдывіста. І суд прыслухаўся да меркавання пацярпелага боку. Мужчыне выпісалі 5 гадоў калоніі строгага рэжыму. Пытанне толькі ў тым калі будзе новая амністыя па каторай ён зможа зноў гуляць па горадзе.