Кіраўнік віцебскай епархіі Дзімітрый (Драздоў) атрымаў грамадзянства Беларусі, хаця пражыў у Беларусі некалькі дзясяткаў гадоў. Ён кіруе Віцебскай епархіяй і завецца епіскапам Віцебскім і Аршанскім больш за 30 гадоў. Аднак паводле Закону Рэспублікі Беларусь «Аб свабодзе сумлення і рэлігійных арганізацыях» кіраўніком рэлігійнай арганізацыі можа быць толькі грамадзянін Рэспублікі Беларусь (арт. 13).
Атрымліваецца, епархію Дзімітрый узначальваў незаконна. Аднак улады не звярталі на гэта ўвагі.
Пра атрыманне ўладыкам Дзімітрыем беларускага грамадзянства напісала прэс-служба епархіі.
З гэтай важнай падзеяй кіраўніка Віцебскай епархіі павіншаваў начальнік УУС Віцебскага аблвыканкаму Андрэй Любімаў. Ён уручыў Дзімітрыю пашпарт.
У сваю чаргу, Дзімітрый аддзячыў міліцыянту Бібліяй і кнігай пра спаведніка Уладзіміра Елянеўскага.
Цікава, што Елянеўскі быў праваслаўным юрыстам, які сядзеў у 30-я гады ХХ стагоддзя у віцебскай турме паводле ілжывага абвінавачвання. Пасля турмы Елянеўскі стаў інвалідам. Пазней ён быў рэабілітаваны ўладамі, а праваслаўнай царквой прылічаны да святых. Цікава, што цяперашнія ўлады Беларусі злачынсвтаў сталінізму не асудзілі, у тым ліку пераслед савецкімі ўладамі святароў. Наадварот, чыноўнікі неаднаразова выказваліся ў падтрымку той палітыкі бальшавікоў.
Вайна ва Украіне, якая пачалася роўна 10 гадоў таму, моцна падзяліла беларусаў. У тым ліку раскол назіраецца сярод праваслаўных. Беларуская аўтакефальная праваслаўная царква, якая цяпер дзейнічае выключна на эміграцыі, асудзіла расейскую агрэсію супраць Украіны. Беларуская праваслаўная царква Маскоўскага патрыярхату, як і кіраўніцтва РПЦ, падтрымлівае вайну Расеі супраць Украіны, а яе патрыярх нядаўна назваў гэтую вайну «свяшчэннай». Праз нязгоду з такой палітыкай шэраг беларускіх праваслаўных святароў, якія служылі пад юрысдыкцыяй РПЦ, вымушаныя былі пакінуць Беларусь. За мяжой частка з іх перайшла пад веданне Канстанцінопальскага патрыярхату.
