30 траўня каля 14 гадзін у Горацкім раёне супрацоўнікі ДАІ спынілі Hyundai пад кіраваннем 28-гадовага мясцовага жыхара з прыкметамі алкагольнага ап’янення.
Пры разглядзе да міліцыянтаў падышла 38-гадовая ўладальніца аўтамабіля, якая ехала ў якасці пасажыра. Яна прапанавала інспектарам 100 даляраў за непрыцягненне да адказнасці свайго прыяцеля. На неаднаразовыя папярэджанні міліцыянераў аб крымінальнай адказнасці за дачу хабару жанчына не рэагавала, адзначаюць інспектары.
На месца здарэння прыбыла следча-аператыўная група. Жанчыну затрымалі і пачалі супраць яе крымінальную справу.
Акрамя таго, у дачыненні кіроўцы складзены два адміністрацыйныя пратаколы: за кіраванне транспартным сродкам без «правоў» і ў нецвярозым стане. Агляд паказаў 2,1 праміле алкаголю.
Дача хабару ў такой сітуацыі была вельмі неабачлівым учынкам жанчыны. Яна не ўлічыла, што ўжо некалькі гадоў міліцыя і дарожныя інстэктары працуюць з уключанымі відэакамерамі, адпаведна, усе іх дзеянні старанна запісваюцца тэхнікай. Таксама, як і дзеянні людзей.
