У Парку Герояў улады вырашылі ўсталяваць агромністы флагшток, на які пойдуць немалыя сродкі з бюджэту дзяржавы. Гавораць пра 5,7 млн рублёў, некаторыя крыніцы пры гэтым нагадваюць пра дэфіцыт бюджэту раёну ў 18 млн.
Агулам плануецца, што вага флагштоку, на які павесяць афіцыйны чырвона-зялёны сцяг, складзе 17 350 кг.
У дакументах распісаная падрабязная працэдура падняцца такога флагштоку на падстаўку і іншыя дэталі мантажу, і таксама рэкамендаваны для гэтага выпадку пад’ёмны кран.
Аўтары праекту адзначаюць, што ў Парку Герояў адсутнічаюць рэдкія прыродныя ландшафты і біятопы. Няма гнездавання рэдкіх птушак. Раней улады, як вядома, загадалі спілаваць у парку шэраг здаровых дрэў. Так што яшчэ да пачатку грамадскіх слуханняў чыноўнікі сталі «рыхтаваць глебу» пад ухвальнае рашэнне.
У абгрунтаванні гаворыцца пра тое, што аўтары вераць, што флагшток будзе сімвалізаваць «нацыянальную згоду» і «патрыятычны дух беларускага народу». Падмурак зробяць з жалезабетону, а сам флагшток аздобяць алюміневымі кампазітнымі панэлямі. Ніжні дыяметр трубы складзе 850 мм, верхні 200 мм. Агульная вышыня складзе 60 метраў.
Грамадскае абмеркаванне праекту пачалося 5 верасня і скончыцца 19 верасня. Пазнаёміцца з дакументамі і планаваным выглядам флагштоку можна на сайце райвыканкаму ў катэгорыі «грамадскія абмеркаванні» або ў будынку гэтай дзяржаўнай установы.
Чырвона-зялёны сцяг — злёгку зменены сцяг БССР, быў прапанаваны першым прэзідэнтам Рэспублікі Беларусь Аляксандрам Лукашэнкам. Перад рэферэндумам прайшла моцная тэлекампанія супраць нацыянальнага бел-чырвона-белага сцяга і герба «Пагоня», калі пра нацыянальныя сімвалы гаварылі спрэс у негатыўным святле, не прыводзячы доказаў. З 1995 году чырвона-зялёны сцяг з’яўляецца дзяржаўным у Беларусі. За нацыянальны бел-чырвона-белы сцяг пераследуюць, яго выкарыстанне рэжым Лукашэнкі забараніў.
