Аўтар кнігі «На „Старт“ і ў „Тэмпе“» Арцём Сізінцаў адзначыў, што кожны даследнік зыходзіць з пачатку з тых матэрыялаў, якія ўжо сабраныя да яго. У сваім допісе ён згадаў некалькі імёнаў футбольных гісторыкаў, якія спрычыніліся да вывучэння гісторыі гульні ў Віцебскай вобласці.
«Тымі сьцяжынамі, якімі ў пошуках ходзіш ты, ужо хадзіў нехта іншы. Пры вывучэньні гісторыі спачатку варта паглядзець, што ўжо адкрыта да цябе. А потым разьвіваць тэму, паглыбляцца, у чымсьці не пагаджацца, выпраўляць памылкі папярэднікаў і ўдакладняць іх з дапамогай новых зьвестак. Гісторыяй беларускага футболу займаліся розныя гісторыкі, краязнаўцы, журналісты. А хто рабіў гэта ў Віцебскай вобласьці? У прыватнасьці, Аркадзь і Леанід Падліпскія і Віктар Плысаў.
У 1984-м у менскім выдавецтве „Полымя“ выйшла брашура А. Падліпскага і Л. Падліпскага „Футбол Витебщины“. Там быў адзін калектыўны здымак аршанскага „Старту“ таго самага году. Празь нейкі час пасьля прачытаньня мне ўдалося знайсьці арыгінал. У выданьні было шмат зьвестак, якія я тады ўбачыў упершыню.
Чытаць і зьбіраць зьвесткі я пачаў у 2011-м, а за год да гэтага ў Віцебску памёр Віктар Плысаў. Нэкралёг я ўспомніў з газэты „Всё о футболе“ (у якой, дарэчы, нейкі час працаваў). Шкада, што ва ўзросьце крыху за 50 плённы дасьледнік гісторыі ножнага шпурляку і аўтар шэрагу кніг, брашураў і даведнікаў пакінуў гэты сьвет. Я крыху-крыху не пасьпеў пазнаёміцца зь ім, не атрымаў мудрасьці, падказак і ўсяго важнага.
Сярод работаў Плысава зьвесткі пра футбол Аршаншчыны ўтрымлівалі, сярод іншых, два даведнікі: „ФК „Орша“ в чемпионатах Беларуси» (Ворша, 2000 год) і «Летопись футбола Витебщины (1912–2001 годы)» (Віцебск, 2002 год). Яны былі прысьвечаныя перад усім статыстыцы. Праз даўнасьць выданьняў і малалікасьць накладаў некаторыя рэчы даводзілася ксэракапіяваць там, дзе яны захоўваюцца.
Безумоўна, займаліся гэтай тэматыкай і іншыя дасьледнікі. Кніга «На „Старт“ і ў „Тэмпе“», на якую ўжо зараз можна аформіць перадзаказ пад спасылкай у першым камэнтары, увабрала ў сябе шэраг зьвестак папярэднікаў і пашырыла пошукі. Дні, месяцы і гады, праведзеныя разам з пылам архіваў і бібліятэк, патрабуюць шмат уседлівасьці. Але разумееш недарэмнасьць працы тады, калі глядзіш на масіў сабранай інфармацыі».
Нагадаем, што 30 верасня збор на кнігу перакрочыў пазнаку ў 25%. Да завяршэння збору яшчэ месяц. Аўтар і выдавецтва спадзяюцца, што ўдасца сабраць усю суму. Яна неабходная для аплаты выдаткаў на кнігу, у тым ліку працу мастакоў і шыхтавальнікаў.
