19 студзеня праваслаўная царква адзначае Хрышчэнне або Вадохрышча. У апошнія гады традыцыя акунацца ў халодную выду на гэтае рэлігійнае свята становіцца ўсё больш папулярнай. У народзе лічыцца, што ледзяная вада на Вадохрышча «змывае ўсе грахі». І апошнім часам да палонак у вадаемах прыходзяць і праваслаўныя, і католікі, і тыя, хто такім чынам хоча загартаваць арганізм ад хваробаў.
Вытокі гэтага звычаю знаходзяцца ў традыцыі пад назваю «Хаджэнне на Ярдань», якая бярэ пачатак у IV стагоддзі. Людзі хадзілі да ракі па «святую ваду» і для акунання на ўспамін пра Хрышчэнне Ісуса Хрыста, які прайшоў абрад асвячэння вадой і прыняў веру. І да сёння лічыцца, што вадохрышчанская вада валодае такой жа цудадзейнай сілай, як і воды Іардана, у якія ўваходзіў Ісус Хрыстос.
МЧС папярэджвае пра небяспеку акунання ў халодную ваду ў неабсталяваных месцах. І паведамляе, што ў Віцебскай вобласці для ахвотных праверыць моц свайго духу будзе падрыхтавана 40 адмысловых месцаў.
На Аршаншчыне іх будзе тры: палонка на Дняпры ў месцы спуску з вул. Караткевіча, палонка на кар'еры «Шчацінка» і крыніца святога пакутніка Пантэлеймона у вёсцы Люціны.
У Лёзненскім раёне акунуцца на Вадохрышча будзе можна ў купелі па вуліцы Набярэжнай у аграгарадку Дабрамыслі і ў палонцы на вадаёме «Лясныя Кар'еры» каля Лёзна. У Талачынскім раёне – у штучнай купелі на тэрыторыі Свята-Пакроўскага жаночага манастыра і на крыніцах у вёсках Лапыры і Чубакова. У Сенненскім раёне – у палонцы на возеры Серакаротня каля вёскі Рабцава і ў купелі на вуліцы Горнай у райцэнтры.
