Царква Святога Іллі ў мястэчку Высокае Аршанскага раёна пабудавана ў першай палове 19 стагоддзя. Фундатарам быў уладальнік мясцовага маёнтка Канстанцін Любамірскі. Царква з'яўляецца помнікам архітэктуры рэтраспектыўна – рускага стылю. У савецкія часы царква была зачынена і прыйшла ў заняпад. Рэстаўрацыя не вядзецца. Між тым гэты будынак з'яўляецца помнікам гісторыі і культуры 3-й катэгорыі і павіны ахоўвацца дзяржавай.

У падобным становішчы апынуўся сёння і сядзібна-паркавы ансамбль Макрыцкіх — яшчэ адзін помнік гісторыі і культуры рэгіянальнага значэння. Комплекс у стылі неакласіцызму быў створаны на мяжы ХІХ-ХХ стагоддзяў, калісьці ў яго ўваходзілі сядзібны дом, 2 флігелі, гаспадарчыя пабудовы, парк. Сядзібны дом вядомы тым, што ўлетку 1928 года тут адбыўся 1 з'езд Камуністычнай партыі Заходняй Беларусі. Пасля Вялікай Айчыннай вайны ў «панскім доме» працавала школа, потым яго перарабілі на жытло для настаўнікаў, а яшчэ ў 1960-я гады ў будынку праводзілі вяселлі - да гэтага вельмі пасавалі вялікія залы... Сёння сядзібны дом знаходзіцца ў закінутым стане і патрабуе неадкладных мер па захаванні.

Існуе небяспека таго, што абодва помнікі апынуцца пад пагрозай знішчэння, бо сёлетні год абвешчаны Годам добраўпарадкавання. І «добраўпарадкаванне» можа скончыцца зносам гістарычных каштоўнасцяў, каб толькі яны не мулялі вока розным праверкам.

Як мы пісалі раней, на гаротны стан помнікаў архітэктуры сёлета звярнула ўвагу пракуратура Аршанскага раёна. Аднак пракурораў абурыла не адсутнасць памкнення рэстаўраваць гістарычныя каштоўнасці, а невыкананне бюракратычных працэдур і несвоечасовыя выплаты ў фонд па падтрымцы культуры і мастацтва.