МТФ «Серкуці» знаходзіцца ў Нямойтаўскім сельсавеце, гэта аднапавярховы цагляны будынак, узведзены ў 1968 годзе. Ферма ўжо некалькі разоў выстаўлялася на аўкцыёны, але ахвотных пакупнікоў не знайшлося. Нават за адну базавую велічыню.
У вёсцы Алексінічы Сенненскага раёна за тыя самыя грошы можна набыць цэлую школу. Гэта практычна сучасны двухпавярховы будынак (год пабудовы – 1998) плошчай 1935 кв.м. У будынку ёсць электрычнасць, у двары -асфальтаваная дарожка, плошча вакол школы абгароджана металічным плотам. Апошні званок у гэтай школе прагучаў у 2018 годзе.
У аграгарадку Багданава на Сенненшчыне за 42 рублі можна набыць дзіцячы садок – двухпавярховы, агульнай плошчай 1789 кв.м. У будынку, узведзеным у 1984 годзе, ёсць і каналізацыя, і вадаправод, і электрычнасць. Але ён не выкарыстоўваецца з 2017 года.
40 гадоў таму ў вёсцы, падобна, было шмат дзяцей – раз спатрэбілася такая грунтоўная дашкольная ўстанова. 30 год таму запатрабаваныя былі і вясковыя школы -- у 1990-я іх актыўна будавалі. А сёння ў Сенненскім раёне за адну базавую іх прадаецца адразу некалькі.
