Завод газетнай паперы быў адным з першых прыкладаў так званага "імпартазамяшчэння". Яго пачалі будаваць у пачатку стагоддзя і з помпай адкрылі пад выбары 2006 года. Але ў свеце дзе наклады газетаў змяньшаюцца, яго эканамічная мэтазгоднасць была пад пытаннем адразу. У выніку дзяржава ўвесь гэты час "за вушы" цягне завод ад банкроцтва. Завод зарэгістраваны ў свабоднай эканамічнай зоне і мае некаторыя ільготы па падатках, але і гэтага мала. Амаль кожны год заводу выдзяляюць дзяржаўныя датацыі.
Гэты год не стаў выключэннем. 6 лютага Савет міністраў падпісаў пастанову пра выдзяленне чарговай датацыі шклоўскаму заводу, а наўзамен завод павінен перадаць частку сваёй долі дзяржаве. Нагадаем, што раней у гэтым годзе датацыю ўжо выдзелілі для Аршанскага ільнокамбінату.
