Гэтага чалавека ў рэгіёне ведаюць многія, у тым ліку як мастака-пастаноўшчыка Народнага тэатра Багушэўскага Дома культуры і як самадзейнага артыста.

Але акрамя сцэнічнай творчасці, Канстанцін Бандарэнка з дзяцінства захапляўся маляваннем, і на выставе ў раённым краязнаўчым музеі будуць дэманстравацца яго працы, выкананыя ў незвычайным стылі. Канстанцін Бандарэнка стварае алоўкавыя малюнкі па матывах твораў выбітных мастакоў свету. За 47 гадоў, а менавіта столькі ён займаецца маляваннем, у яго аўтарскім зборы налічваецца 575 мастацкіх копій. Сярод іх – творы мастакоў Вячаслава Сяргеева, Васіля Шаранговіча, Міхаіла Савіцкага, Аляксандра Шылава, Фёдара Рокотова, Леанарда Да Вінчы, Сандра Батычэлі, Рафаэля Санці і многіх іншых.

Яшчэ адна грань творчай натуры Канстанціна Бандарэнкі - паэтычная, ён піша вершы і эпіграмы. Яшчэ – добра спявае. Але, мабыць, найбольшую вядомасць у землякоў ён мае як удзельнік спектакляў Народнага тэатра. У багушэўскую самадзейную трупу ён прыйшоў у 1991 годзе, калі працаваў у саўгасе імя Гараўца тэхнікам штучнага асемянення.

Неабходнасць часта ездзіць на рэпетыцыі ніколькі не палохала. Па словах самога Канстанціна, аб сцэне ён марыў заўсёды і з задавальненнем удзельнічаў у канцэртах як спявак і як акцёр. Творчасць настолькі натхняла мужчыну, што з часам ён атрымаў і прафесійную адукацыю – скончыў вучылішча мастацтваў. Некаторы час Канстанцін Бандарэнка працаваў рэжысёрам самадзейнага тэатра, а ў яго акцёрскім багажы – больш за 20 роляў у розных спектаклях.

Дарэчы, праз 3 гады багушэўскі Народны тэатр адзначыць 100-годдзе свайго існавання.