Абвінавачаны працаваў у Магілёве вядучым інжынерам па матэрыяльна-тэхнічным забеспячэнні. Ён быў упаўнаважаны здзяйсняць біржавыя ўгоды на таргах ад імя прадпрыемства.
І ўсё было б добра, калі б не “прывабная прапанова”, якая паступіла ад аднаго індывідуальнага прадпрымальніка. Заключалася яна вось у чым: вядучы інжынер павінен быў зніжаць пры закупках на біржы тэрміны пастаўкі тавараў з 30 да 5 каляндарных дзён. А што тут такога? Справа ў тым, што менавіта гэты нюанс дазваляў гэтаму іпэшніку перамагаць на такіх біржавых таргах.
У выніку агульная сума такіх угодаў дасягнула больш за 1,8 млн рублёў. За гэта абвінавачаны некалькі разоў атрымаў хабар, агульная сума – не менш за 7 900 долараў ЗША.
Абвінавачаны ва ўсім прызнаўся, а суму хабару добраахвотна пералічыў у бюджэт.
Суд прызначыў пакаранне: 4 гады ў папраўчай калоніі ва ўмовах узмоцненага рэжыму, а таксама штраф у 700 базавых велічыняў (29 400 руб.). Акрамя гэтага абвінавачаны пазбаўляецца на 5 гадоў права займаць пасады, звязаныя са здзяйсненнем юрыдычна значных дзеянняў.
Гэты прысуд у законную сілу не ўступіў і можа быць абскарджаны і апратэставаны.
