Курортны збор складае 5%. Бярэцца ад кошту пуцёўкі ў санаторна-курортную ці аздараўленчую арганізацыю (прафілакторый, спартыўна-аздараўленчы лагер, базу адпачынку, пансіянат і да т.п.). Калі пуцёўка не афармляецца, то ад кошту платных паслуг пры наведванні санаторна-курортнай ці аздараўленчай арганізацыі з пражываннем. Плацяць яго фізічныя асобы, то бок людзі, а не арганізацыі. Аплаціць трэба не пазней за апошнія суткі знаходжання ў санаторна-курортнай або аздараўленчай арганізацыі.

Плаціць не павінны непаўналетнія беларускія грамадзяне, людзі, якіх накіравалі на аздараўленне і санаторна-курортнае лячэнне бясплатна ці пасля няшчаснага выпадку, і некаторыя іншыя катэгорыі.

Якія санаторыі і аздараўленчыя арганізацыі ёсць у Талачынскім раёне? Знайсці адказ на гэтае пытанне ў інтэрнэце дастаткова складана. Ні на сайце райвыканкама, ні ў пошукавіках нам не ўдалося знайсці нешта канкрэтнае. Магчыма, гэта толькі нам так не павезла.

Але турысту ў Талачынскім раёне сапраўды ёсць што паглядзець: Свята-Пакроўскі жаночы манастыр, царква Святой Тройцы ў вёсцы Манастыр, касцёл святога Антонія, фрагменты прысядзібнага пейзажнага парка XIX стагоддзя, каменны крыж позняга сярэднявечча каля вёскі Галошава, сядзібна-паркавы ансамбль Цюндзявіцкіх у вёсцы Галошава, гіпербалоідная вежа Шухава.

На тэрыторыі Талачынскага раёна – 22 помнікі археалогіі, 8 помнікаў архітэктуры і 3 помнікі гісторыі.