14 сакавіка каля першай гадзіны дня стала вядома пра пажар у вёсцы Саськаўка Шклоўскага раёна. Жылы дом згарэў практычна поўнасцю, на папялішчы знайшлі парэшткі нежывога чалавека, асобу якога адразу ўстанавіць не ўдалося. Таксама высвятляюцца і прычыны пажару.
Да слова, за апошнія суткі гэта адзіны смяротны выпадак падчас пажару па ўсёй Беларусі.
Аднак Шклоўскі раён не сыходзіць са зводак Міністэрства па надзвычайных сітуацыях ужо трэці дзень.
13 сакавіка пажарны нарад паспеў справіцца з агнём і ўратаваць пабудову на Шклоўшчыне. Людзі не пацярпелі.
Раніцай 12 сакавіка ў бальніцу з апекамі трапіў жыхар вёскі Еўдакімавічы Шклоўскага раёна. Мужчына 1963 года нараджэння стаў ахвярай неасцярожнага абыходжання з агнём: паводле яго слоў, загарэлася пасцельная бялізна на ложку, дзе ён спаў.
Службы МНС рэгулярна праводзяць прафілактычныя мерапрыемствы, распавядаючы насельніцтву Шклоўскага раёна пра супрацьпажарную бяспеку. Але прафілактычныя размовы ўздзейнічаюць, як паказвае рэчаіснасць, не на ўсіх.
