На Дубровеншчыне прадаюцца два будынкі былых сельвыканкамаў. Кошт больш чым дэмакратычны — адна базавая велічыня.
Такім чынам, усяго за 42 рублі можна набыць аднапавярховы цагляны будынак Маласавінскага сельскага выканкама разам з гаражом, пуняй і жалезабетонным плотам. Маёмасць знаходзіцца ў вёсцы Малое Савіна.
За такія самыя грошы прадаецца цагляны адміністрацыйны будынак у вёсцы Кляны. У дадатак да яго прапануецца ўзяць у арэнду на 50 гадоў участак плошчай 0,1527 га. Праўда, ёсць абмежаванні ў яго выкарыстання: ён знаходзіцца на ўчастку ў водаахоўнай зоне рэчкі Лука.
Прапановы набыць за адну базавую велічыню закінутую ферму, былую краму, зачыненую школу або вясковы дом культуры сталі ўжо звычанай справай. Выстаўленыя на продаж па мінімальным кошце будынкі сельвыканкамаў — пакуль яшчэ рэдкасць.
Але ўсё гэта — з’явы аднаго парадку: моладзі на вёсцы становіццы ўсё меней, сельскае насельніцтва скарачаецца, сельсаветы аб’ядноўваюцца, а мясцовыя ўлады не ў стане па-гаспадарску выкарыстаць маёмасць, якая становіцца незапатрабаванай. Нават калі гэта былая ўласная маёмасць.
