Усё гэта здарылася яшчэ 12 студзеня ў Віцебску, але стала вядома днямі. Гісторыя пачалася з таго, што адна жанчына прывяла свайго прыяцеля з Лёзненскага раёна ў віцебскую кватэру. Пазней туды зазірнуў яшчэ адзін чалавек, які прыглядаў за сталым насельнікам гэтага жылля - катом.
Мужчыны селі за стол, пачалі піць. У нейкі момант палаяліся, і віцяблянін нанёс першы ўдар у гэтай драме. Але быццам пасля гэтага наступіў мір, жарсці ўлягліся, выпілі яшчэ. Аднак абражаны мужчына з Лёзненскага раёна вырашыў адпомсціць - схапіўся за нож і параніў крыўдзіцеля.
Той пачаў губляць шмат крыві. Жанчына пабегла да суседзяў і папрасіла выклікаць хуткую. Прыехалі дактары і міліцыя. Пацярпелага павезлі ў лякарню, а нападніка затрымалі.
Следства сабрала доказы: кроў пацярпелага знайшлі на вопратцы абвінавачанага і нажы, а на ягонай рукаятцы - адбіткі абвінавачанага. Аказалася, што ён ужо быў судзімы за падобнае злачынства.
Цяпер яму выставілі абвінавачанне ў наўмысным прычыненні цяжкіх цялесных пашкоджанняў. Ён можа загрымець на тэрмін ад 5 да 15 гадоў.
