У прыватнасці, у першы дзень вясны амаль не працаваў цэнтральны рынак, падобная сітуацыя і ў "Антэі", што на Раніцы. Але гандлёвы цэнтр "Орша-Сіці" працаваў у звычайным рэжыме, масавага нявыхаду прадпрымальнікаў на працоўныя месцы не назіралася.

Праблемы з прадпрымальнікамі звязаныя з тым, што 1 сакавіка пачаў дзейнічаць указ Лукашэнкі № 222, згодна з якім кожная адзінка тавару, якая ёсць у наяўнасці, павінна суправаджацца адмысловымі дакументамі. Неўзабаве гандаль без суправаджальнай дакументацыі на кожную адзінку тавару будзе забаронены. У выпадку парушэння прадпрымальнік будзе аштрафаваны на 9 мільёнаў рублёў, а ягоны тавар канфіскаваны. У краіне ўжо былі зафіксаваныя выпадкі спантанных праверак і стыхійных канфіскацый прадукцыі. Форум індывідуальных прадпрымальнікаў, які адбыўся ў Менску, ня здолеў адтэрмінаваць дзеянне ўказу.

Асноўная крыніца, адкуль прывозяць тавар на рынкі Оршы - суседняя Расея, а там, як правіла, оптавыя базы працуюць без выдачы сертыфікатаў на прадукцыю. У выніку прадпрымальнікі многіх буйных і невялікіх гарадоў Беларусі 1 сакавіка ня выйшлі на працу. Некаторыя спецыялісты адзначаюць, што ў асяродку прадпрымальнікаў няма адзінага меркавання, што рабіць. Магчыма, нехта 1 сакавіка ня выйшаў на працу проста з-за таго, што баяўся канфіскацыі тавару, а не дзеля падтрымкі пратэсту, які многім людзям бачыцца адзіным выйсцем з сітуацыі.