Поўная назва нумару гучыць так: ARCHE. Бітва пад Оршай: месца памяці і канфлікт інтэрпрэтацый. Для Беларусі выданне такога грунтоўнага зборніка навуковых артыкулаў прысвечаных Бітве значная падзея ў навуковым свеце. Некаторыя артыкулы прыведзеныя ў часопісе нідзе яшчэ не публікаваліся і былі напісаныя спецыяльна для нумара. напрыклад, расійскі аўтар, які сёння працуе ў Германіі Канстанцін Ерусалімскі спецыяльна для часопісу напісаў артыкул "Вязні Вялікай бітвы: Турма ці эміграцыя?". Пры тым, што тэма палонных маскавітаў раней для беларускага чытача грунтоўна не раскрывалася. Упершыню беларускаму чытачу прадстаўлены пераклады некаторых лацінамоўных тэкстаў, якія пісаліся пра Бітву і наш горад. У прыватнасці, у нумары апублікаваныя пераклады лістоў "Караля Польшы да караля Венгрыі і Багеміі", "Караля Жыгімонта да Папы Льва Х", "Жыгімонта, караля, арцыбіскупу Яну Ласкаму, паслу ў Рыме", "Пізо, апостальскага легата, да Яна Карыцыя пра перамогу караля над москамі" і г.д.
У нумары маюцца грунтоўныя крыніцазнаўчыя артыкулы, якія падрабязна разглядаюць, напрыклад, карціну Бітва пад Оршай, фота копія якой знаходзіцца ў аршанскім касцёле святога Язэпа і літаратурны помнік "Пахвала князя Канстанціна Астрожскага".
Акрамя гэтага нумару былі прэзентаваныя і іншыя выданні, напрыклад, нашумелая кніга "Шлюбныя і па-за шлюбныя стасункі ў Вялікім княстве Літоўскім", нумар ARCHE, які выйшаў літаральна некалькі дзён таму прысвечаны перакладам замежнай літаратуры на беларускую мову, у якім упершыню цалкам публікуеца на беларускай мове знакаміты раман "Код Да Вінчы" ды і шмат іншых выданняў.
