Пасля закрыцця маста на ільнокамбінаце ўвесь рух транспарту з мікрараёнаў Задняпроўя перанакіраваўся на мост паміж вуліцамі Камсамольскай і Магілёўскай. Адпаведна нагрузка павялічылася і на гэтыя вуліцы.

Два разы на суткі тут выстройваюцца чэргі з аўтамабіляў. Раніцай найбольшы пік прыходзіцца на час з 7 да 9 гадзін, вячэрняя пробка выстройваецца з 17 да 19 гадзін. У выходныя пробкі больш прывязаныя да раскладу працы гарадскога рынку.

Найбольш праблематычнымі скрыжаваннямі сталі перасячэнне вуліцаў Карла Маркса і Камсамольскай, а таксама Камсамольскай і Леніна. Некалькі першых пасля закрыцця маста вечароў рухам тут кіравалі рэгуліроўшчыкі, а і пры гэтым у грамадскім транспарце можна было прастаяць да 20-30 хвілін.

Грамадскі транспарт, як раз такі, найбольш церпіць ад пробак. Справа ў тым, што на скрыжаванні Камсамольскай і Леніна пераважная большасць аўтобусаў і маршрутак робіць левы паварот. Паводле правілаў дарожнага руху пры левым павароце аўтамабіліст мусіць прапусціць транспарт які рухаецца па прамой. З-за таго што транспарту тут збіраецца шмат, то пакуль гарыць зялёны сігнал светлафору левы паварот паспяваюць зрабіць два-чатыры аўтамабілі. Астатнія ў чаканні сваёй чаргі ствараюць пробку, якая вечарам расце ўсё больш і больш.