Хлебзавод, які знаходзіцца на скрыжаванні вуліц Грыцаўца і Заслонава, зачынены і здаецца ў арэнду. Гісторыя прадпрыемства пачынаецца яшчэ з даваенных часоў (на старых фотаздымках бачныя будынкі заводу). Пасля вайны завод быў арганічнай часткай планавай эканомікі - прадукцыя прадавалася толькі ў крамах ОРС (сетка абслугоўваючых прадпрыемстваў і крамаў), а крамы былі ў чыгуначных раёнах горада і шэрагу вёсак пры чыгуначных станцыях. Пры гэтым жыхары гэтых раёнаў пры магчымасці імкнуліся купіць хлеб "гарадскі" (Аршанскага хлебзавода). У рынкавых умовах, калі ў чыгуначных раёнах знікла манаполія ОРС, а вясковыя крамы ўсё часцей зачыняліся, прадукцыя аказалася ўвогуле не запатрабаванай, завод пачаў несці страты. Пры гэтым ОРС перажывае таксама цяжкія часы і падтрымліваць стратнае прадпрыемства не стаў. У выніку, некалькі месяцаў таму завод зачыніўся, а нядаўна на яго браме з'явіўся плакат "Здаецца ў арэнду".
Хлебзавод не першы ОРСаўскі аб'ект які прапаноўваецца ў арэнду. Не так даўно ў арэнду было здадзена памяшканне кавярні "Спатканне", а сёння ў арэнду прапаноўваецца памяшканне крамы па вуліцы Станцыённая.
