Першай са студыі выйшла песня "Мара". Праўда, у адрозненні ад канцэртных выступаў, у запісе адсутнічае баян ад Яўгена Накваса. Бо для гурта першы запіс атрымаўся эксперыментальным - зараз музыкі шукаюць "свой гук" і плануюць зрабіць гэтую ж песню яшчэ ў некалькіх варыянтах.
І хаця гурт яшчэ шукае і эксперыментуе, песня ўжо многім спадабалася. Так, яшчэ ў гэтым годзе песня патрапіць у ратацыю самага папулярнага інтэрнэт-радыё краіны Aplus, а пасля Новага году і ў ратацыю "Радио Фонарь".
Пры гэтым гурт працягвае канцэртную дзейнасць. На днях "Лепшы квас" выступіў на курсах "Мава нанова" ў Маладзечна і плануе далей выступаць у падтрымку беларускай мовы на гэтых курсах у іншых гарадах краіны.
