Прыгожыя сінія елкі зрэзаныя пад корань у самым цэнтры Оршы. Аршанцы з жахам заўважылі змены ў абліччы Дзіцячай школы мастацтваў №1 на вуліцы Леніна. Вялікія дрэвы, якія не адзін год складалі, па сутнасці, неад'емную частку "музыкалкі", спілаваныя дашчэнту.
Знішчэнне зялёных прысадаў па ўсёй Оршы "трыўмфальна" набывае ўсё большыя маштабы, відаць, для цяперашняга кіраўніцтва горада гісторыя, экалогія і проста эстэтычны складнік азначаюць пустыя словы. Значэнне маюць, напэўна, толькі далейшае ўвядзенне ў двухпавярховую забудову вуліц Міру і Леніна маленькіх офісаў і крамаў з тыповымі прыступкамі, платная прыбіральня на месцы былога прыватнага сектару па вуліцы Мінскай і пошук швабраў для лядовага палаца.
Ялінкі, якія радавалі вочы шмат гадоў, цяпер аказаліся нікому не патрэбнымі. Адгаворкі пра тое, што елкі засланілі сонца для юных музыкаў, мастакоў і іх настаўнікаў не праходзяць — шмат вокнаў на фасаднай частцы будынка школы зробленыя не на кабінеты, таму ялінкі засланялі ў асноўным гардэроб, хол і лесвіцы.
Раней сінія елкі знішчылі каля будаўнічага трэсту №18 па вуліцы Талстога.
