Міліцэйскія зводкі даюць адразу некалькі паведамленняў пра крадзяжы транспарту ў Оршы, якія адбыліся з разбежкай у некалькі дзён.
Так, у ноч з 23-га на 24-е красавіка ў Оршы быў скрадзены Фольксваген-Транспарцёр 1992 года выпуска. Гаспадар заўважыў знікненне машыны раніцай і тады звярнуўся ў міліцыю, паведамлення пра тое што аўтамабіль знойдзены пакуль не было.
22 красавіка ў міліцыю звярнуўся мужчына, які працуе кіроўцам у індывідуальнага прадпрымальніка. Па яго словах, у перыяд з 20 гадзін 21 красавіка да 18 гадзін 22 красавіка з грузавога "Рэно" невядомы скраў два акамулятары. Прычым крадзёж адбыўся на ахоўваемай тэрыторыі аднаго з прадпрыемстваў Оршы. Заведзена крымінальная справа, страты ацэнены ў 5,4 мільёны рублёў.
А ў перыяд з 15 па 18 красавіка ў лецішча гаспадара быў скрадзены ровар "Мінск" 2006 года выпуска. Невядомы ўзламаў запоры ў доміку на лецішчы і разам з роварам скраў яшчэ і электраправодку, кансервы, агулам на суму 3,2 мільёны рублёў.
