Сумеснае беларуска-славацкае прадпрыемства па перапрацоўцы электратэхнічных адкідаў будзе створана ў Оршы. Пра гэта паведаміў журналістам Надзвычайны і Паўнамоцны Пасол Славаччыны ў Беларусі Ёзэф Мігаш. Ёзэф Мігаш прымае ўдзел у V Міжнародным эканамічным форуме "Інавацыі. Інвестыцыі. Перспектывы", які праходзіць у Віцебску.
"Мы цяпер працуем над рэалізацыяй канкрэтнага праекта ў Оршы. Там ствараецца сумеснае прадпрыемства па перапрацоўцы электратэхнічных адкідаў, гэта тэлевізары і іншая тэхніка. На вытворчасці будзе ўстаноўлена наша лінія, укладзеныя інвестыцыі. У 2017 годзе прадпрыемства ўжо мае працаваць", - расказаў дыпламат.
Эканамічны форум разлічаны на два дні. Удзельнікі мерапрыемства будуць працаваць не толькі ў Віцебску, але і ў Оршы, дзе адбудзецца выязная секцыя "Інавацыі і перспектывы ў лагістычным сектары", піша БЕЛТА. Акрамя гэтага, удзельнікі форуму пабываюць на вядучых прадпрыемствах Аршанскага раёна.
