Сёння прайшло паседжанне Віцебскага абласнога выканкаму і прэзідыюму савету дэпутатаў па фармаванні камісіяў па выбарах абласнога савету дэпутатаў. Па Аршаншчыне будзе абрана 8 абласных дэпутатаў, адпаведна, ў нас будзе створана 8 такіх камісіяў.
Большасць тых, хто патрапіў у спісы сябраў камісіяў гэта бюджэтнікі, якія вылучаліся шляхам збору подпісаў. Сярод грамадскіх арганізацыяў практычна ў кожнай акрузе ёсць прадстаўнікі БРСМ і "Белай Русі". Шмат дзе ўвайшлі ў склад камісіяў прадстаўнікі прапазіцыйнай Камуністычнай партыі Беларусі.
Іншая сітуацыя з апазіцыйнымі партыямі. Большасць сябраў партыяў не былі ўключаны ў склад камісіяў. З 24 сябраў Партыі БНФ у склад камісіі ўвайшла толькі полацкая пісьменніца Лера Сом. З 22 сябраў апазіцыйнай камуністычнай партыі "Справядлівы Свет" у склад камісіяў патрапілі 6 чалавек, надзіва, 5 з іх уключаныя па Аршаншчыне. Акрамя "Справядлівага Свету" па Аршаншчыне ў склад камісіяў больш не патрапіла аніводнага сябра апазіцыйных партыяў, хаця Аб'яднаная грамадзянская партыя і Партыя БНФ таксама вылучалі па тры сваіх прадстаўніка.
Па суседняму Талачынскаму раёну сярод прадстаўнікоў апазіцыі вылучаліся два сябры "Справядлівага свету" - аніводны не прайшоў.
