На фестываль, што адбыўся ў канцы ліпеня былі запрошаныя аршанец Аляксандр Хадэ і гамяльчанка Юлісіс Нэўмер. Пра фестываль яны даведаліся ад сяброў і вырашылі адправіць заяўку ад свайго дуэта Hade & Ulysses. Нечакана атрымалі станоўчы адказ, адзначаюць мастакі для tut.by. Канкурэнцыя была агромністай – заяўкі адправілі тысячы вулічных мастакоў з усёй планеты, а журы адабрала толькі 300 чалавек, сярод якіх аказаліся і нашы беларусы. Удзельнікаў набралася з 40 розных краін, а ў Брысталь на фестываль з’ехалася яшчэ 30 тысяч прыхільнікаў “стрыт-арту”.
Свой малюнак гамяльчанка і аршанец рабілі на шчыце 8 х 2,5 метры. На малюнку дзяўчына, выкананая ў бэзавых адценнях, глядзіцца ў люстэрка, у якім бачыць хлопчыка – сваю супрацьлегласць. Як патлумачыла Юлісіс Нэўмер, на малюнку выяўлена сутнасць кожнага чалавека: калі нельга стаць звонку тым, кім хочаш, дык можна стаць такім унутры.
