Сёння -11 жніўня - прайшлі паседжанні Аршанскай і Аршанскай-Дняпроўскай камісіяў. На паседжанні адбылася рэгістрацыя кандыдатаў у дэпутаты - створаны канчатковы спіс тых асобаў за якіх змогуць прагаласаваць жыхары Аршанскага раёну. Хаця выбарчая кампанія і без таго праходзіць даволі сумна, камісія не зарэгістравала адных з самых цікавых кандыдатаў у дэпутаты. Можна і не гаварыць, што "не рэгістрацыя" прайшлася перш за ўсё па дэмакратычных кандыдатах. Такім чынам, па Аршанскай камісіі, якая аб'ядноўвае большую частку гораду былі не зарэгістраваны вылучэнец ад Аб'яднанай грамадзянскай партыі, які мусіў прадстаўляць перад выбарцамі права-цэнтрысцкую кааліцыю і Віталь Паўлаў кандыдат ад Партыі БНФ, партыя якая планавала весці найбольш актыўную работу з выбарцамі праз вулічныя пікеты. Такім чынам, па гэтай акрузе альтэрнатыву вылучэнцы ўлады і праўладным кандыдатам складзе адзін толькі Сяргей Калякін, старшыня Партыі аб'яднаных левых "Справядлівы Свет".
Па Аршанскай-Дняпроўскай акрузе без рэгістрацыі засталіся тры кандыдаты: фермер, вылучэнец ад кампаніі "Гавары праўду" Ігар Грышанаў і пенсіянер, самавылучэнец Уладзімір Усік. У гэты ж спіс нечакана патрапіў і вылучэнец КПБ Ігар Вялітчанка. Адзіным дэмакратам на акрузе застаецца вылучэнец Аб'яднанай грамадзянскай партыі, мастак Яўген Анішчанка.
Галоўная прычына не рэгістрацыі - не правільна ўказаныя заробкі (як у выпадку з Вялітчанка) і не ўказаная маёмасць (Усік і Паўлаў не ўказалі акцыі прадпрыемстваў, якімі не карыстаюцца). Заўтра камісіі выдадуць кандыдатам пісьмовыя тлумачэнні іх не рэгістрацыі і пра прычыны можна будзе напісаць больш, таксама заўтра стане вядома хто з кандыдатаў будзе абскарджваць рашэнне камісіі.
