Беларускі бард Андрэй Мельнікаў, большая частка жыцця якога звязана з Воршай, перадаў для грамадскага карыстання ў мясцовы офіс Таварыства Беларускай Мовы ўласную беларускамоўную бібліятэчку. Гэта – некалькі соцень кніг і некалькі тысяч асобнікаў перыядычных выданняў.

– У маёй хаце на Горацкай гэтая літаратура была запатрабавана апошнім часам хіба толькі мной. На офісе ж ТБМ, спадзяюся, яна знойдзе больш масавага і разнастайнага чытача. – так патлумачыў свой учынак дабрачынца.

На фатаздымку бачна, што на адной з палічак перададзенай бібліятэчкі прысутнічае руская мова. І гэта не выпадковасць.

– Ёсць такая ідэя, сярод тых хто цаніў нядаўна памерлага Алеся Шутава, які доўгі час кіраваў аршанскім ТБМ, на базе яго бібліятэчкі стварыць грамадскую. Алесь карыстаўся ня толькі беларускамоўнымі выданнямі, ён планавана падбіраў літаратуру і вельмі рэзультатыўна ёй карыстаўся, быў не "піярным", але рэальным інтэлектуалам, – кажа Мельнікаў. – У мяне тут у Воршы застаецца нямала небеларускамоўнай літаратуру, якую я б задаваленнем перадаў такой грамадскай бібліятэцы, адно што хацеў бы мець за ёй пэўны кантроль, каб літаратура не ляжала мёртвым грузам, не знікала і не сышла ў макулатуру… Можна ўзгадаць, што ініцыятыва Мельнікава – не эксклюзіў. Так, некалькі гадоў таму, згодна з запаветам ураджэнца Аршаншчыны пісьменніка Янкі Сіпакова была перададзена нашай бібліятэцы імя Пушкіна ўласная бібліятэка гэтага творцы і заняла там цэлы кабінет. Па задумцы Сіпакова, гэтыя кнігі павінны быць запатрабаваныя землякамі і ім дапамагаць. І хай гэта стане добрай аршанскай традыцыяй: вартыя кнігі ня тым, хто здае іх у макулатуру, а ўдзячным чытачам!