Самы масавы мітынг камуністаў за апошнія гады адбыўся 7-га лістапада ў Оршы. Раніцай каля помніка Леніну з'явіліся чырвоныя і зялёныя сцяжкі, хаця яшчэ з вечару наш сайт паведамляў, што сцягоў не было. Збірацца на Цэнтральнай плошчы горада людзі пачалі прыкладна а 10:20, доўгі час іх колькасць не перавышала 5-7 чалавек, аднак аб 11-00, калі і мусіў распачацца мітынг, колькасць істотна ўзрасла. Калі ў папярэднія гады ля помніка Леніну ў цэнтры горада збіралася толькі купка людзей, то на гэты раз адсвяткаваць важны для сябе дзень сабраліся звыш 50 камуністаў. Некаторыя з іх мелі пры сабе камуністычную сімволіку. Завяршыўся мітынг ускладаннем кветак да помніка Леніну. Стваральніку СССР прынеслі шмат чырвоных гваздзікаў і святочную паштоўку.
