Суд Оршы і Аршанскага раёну асудзіў да 6 гадоў калоніі былога міліцыянта і інкасатара. Трагедыя здарылася ў ноч з 1 на 2 ліпеня 2016 года каля 3:20 на дарозе Орша - Горкі непадалёк ад вёскі Стаўры. Пры гэтым міліцыя пацвердзіла аварыю толькі 4-га ліпеня. Аўтамабіль "Пежо" выехаў на сустрэчную паласу і збіў 61-гадовага пенсіянера, які рухаўся на мапедзе. Сутыкненне было настолькі моцным, што супрацоўнікі органаў унутраных спраў, якія прыбылі на месца здарэння, спачатку думалі, што 38-гадовы кіроўца збіў на машыне дзікую жывёлу. Але рэальнасць аказалася іншай - у некалькіх метрах ад "Пежо", які ад сутыкнення з'ехаў на збочыну, а яго кіроўца атрымаў пэўныя траўмы, знайшлі знявечанае цела мапедыста. Траўмы былі настолькі жахлівымі, што пенсіянера нават хавалі ў закрытай труне.
Многія падрабязнасці справы высветліліся толькі на судзе і ўпершыню сталі вядомымі аршанцам. У кіроўцы "Пежо" ў крыві было 1,9 праміле алкаголю, у гэты дзень ён быў на рыбалцы разам з бацькам і піў. Затым вырашыў паехаць на машыне, хаця раней быў пазбаўлены кіроўчых правоў. Пасля трагічнай аварыі, якую колішні інкасатар і міліцыянт учыніў па сваёй віне, ён спрабаваў уцячы ад аператыўнікаў, аднак яго машыну дагналі ў полі. Па трасе перад трагічным сутыкненнем з мапедам, "Пежо" рухаўся з недапушчальнай хуткасцю ў 92 км/г.
Сваёй віны ў аварыі і смерці мужчыны кіроўца не прызнаў. Суд вынес вырак: 60 тысяч рублёў (пасля дэнамінацыі) кампенсацыі сваякам загіблага і 6 гадоў у калоніі.
