Затрыманне на дарогах Усходняй Беларусі нелегальнага алкаголю, які вязуць праз адкрытую мяжу з Расіяй справа нярэдкая, але ў гэты раз на дзвюх розных дарогах было затрымана адразу два вялікіх грузы. Знаходкі гэтыя звязаныя з правядзеннем адмысловага рэйду па выяўленні нелегальных тавараў з суседняй краіны.
Мытны камітэт краіны паведамляе пра затрыманне на дарозе Смаленск - Віцебск у Лёзненскім раёне 425 літраў кантрафактнага алкаголю. Супрацоўнікі мытні спынілі на трасе пасажырскі аўтобус, у багажных аддзяленнях якога знайшлі 385 літраў алкаголю без акцызных марак і яшчэ 40 літраў алкаголя з расійскімі акцызамі.
У другім выпадку груз быў знойдзены на трасе Орша-Магілёў. Затрыманы спірт паспеў праехаць праз Аршанскі раён і затрыманы быў ужо на Магілёўшчыне. Як паведамляе "Радыё Магілёў" міліцыя спыніла фуру "Ман" з паўпрычэпам, а ў ёй знайшлі 24 тысячы літраў спіртаўтрымліваючай вадкасці. Пры гэтым, дакуманты на груз былі несапраўднымі - у іх быў напісаны неіснуючы грузаатрымальнік, а сам груз быў запісаны як антысептычны раствор для апрацоўкі драўніны.
