Чарговы раз у Оршы выяўленыя фальшывыя купюры, на гэты раз у горадзе знойдзена купюра ў 5.000 расійскіх рублёў. Але вельмі часта ў горадзе знаходзяць і фальшывыя беларускія папяровыя грошы новага ўзору, пры чым нават самага дробнага наміналу - 5 рублёў. Фальшыўкі, якія час ад часу міліцыя выяўляе, даволі высокай якасці і пры любым падазрэнні іх лепш правяраць на святло.
Акрамя паведамлення пра фальшывыя грошы, зводка МУС гаворыць пра распачатую крымінальную справу ў дачыненні да жыхара Оршы, у якога яшчэ 22 снежня было знойдзена 242 грамы высушанай марыхуаны.
Зводка УУС паведамляе пра здарэнне, якое - па меркаванні ахвяры злачынцаў - адбылося яшчэ ў кастрычніку 2016 года. З заявай пра здзейсненае злачынства пацярпелы звярнуўся ў міліцыю толькі на днях. Раней судзімыя "гастралёры" з Оршы скралі ў жыхара Ліозна з гаража, які знаходзіцца каля яго дома, 160 літраў дызельнага паліва і 20 літраў аўтамабільнай алівы. Падазраваныя выяўлены, распачата крымінальная справа.
