Ігар вяртаўся з Польшы ў ноч з 4-га на 5-е сакавіка. Калі амаль усе памежныя працэдуры былі выкананыя і аўтобус, на якім ехаў Казмерчак, ужо быў гатовы пакінуць тэрыторыю памежнага пераходу, афіцэр мытні папрасіў выйсці з рэчамі аршанскага актывіста. Прычыну па якой Ігар быў затрыманы ніхто з мытнікаў не назваў, патлумачыўшы толькі, што "гэта не наша ініцыятыва". Пры гэтым, як гаворыць сам актывіст, было бачна, што мытнікі шукаць нейкую інфармацыю, але не разумеюць якую канкрэтна. Такім чынам, мытнікі перагледзілі кожную рэч, якую Ігар вез сабой, асобна перагледзелі змесціва ноўтбука і тэлефона, але нічога не знайшоўшы, падверглі Казмерчака асабістаму нагляду. У выніку, з-за ўсяго дагляду - акрамя таго, што аўтобус прыблізна 1,5 гадзіны праходзіў мяжу да затрымання Ігара - Казмерчак і іншыя пасажыры аўтобуса страцілі яшчэ каля 3 гадзін.

Сам гарамадскі актывіст лічыць, што гэтае затрыманне на мяжы звязана з акцыяй пратэсту 12-га сакавіка ў Оршы ды іншых гарадах - апошнім часам у некаторых гарадах актывістаў якія маюць дачыненне да акцыяў "недармаедаў" пачалі затрымліваць. Хаця сам Казмерчак пра акцыю пратэсту даведаўся праз інтэрнэт знаходзячыся ў Польшы.

У Польшы Ігар знаходзіўся на працягу тыдня па запрашэнні мясцовых грамадскіх арганізацый. Пад час візіту старшыня АМГА "Звяз" і рэдактар нашага сайту, правёў шэраг сустрэчаў з польскімі журналістамі, бізнэсмэнамі, кіраўнікамі органаў мясцовага самакіравання і грамадскіх арганізацый.