З 10 красавіка ў Віцебскай вобласці лоў рыбы амаль забаронены - выключэнне лоў на адну вуду з адным кручком і пры выкананні яшчэ шэрагу ўмоваў. Сезонная забарона ўведзена ў сувязі з нерастам рыбы. Але далёка не ўсе гатовы выконваць гэтую забарону, хаця за парушэнне і ўведзены вялікія штрафы.
Але ёсць і тыя хто гатовыя даць адпор браканьерам. Нехта з такіх неабыякавых людзей і паведаміў у Аршанскую міжраённую інспекцыю па ахове жывёльнага і расліннага свету пра факт браканьерства каля вёскі Перавалачная Талачынскага раёну. Тут на мясцовым вадаёме невядомыя ноччу лавілі рыбу сеткамі. Але пакуль інспектары аховы прыроды дабраліся да месца парушэння, парушальнікі ўжо з'ехалі з месца. Спыніць іх удалося толькі на трасе Брэст-Масква па апісанні машыны на якой яны ехалі. Затрымалі машыну - у багажніку якой і былі знойдзены 8 сетак даўжынёй у 720 метраў і 90 кілаграмаў рыбы - супрацоўнікі ДАІ.
Па інфармацыі сайта дзяржінспекцыі.
