17 красавіка бягучага года Паўлу Левінаву вынеслі пастанову аб пакаранні ў выглядзе адміністрацыйнага арышту тэрмінам на 15 сутак за ўдзел у ня дазволеных ўладамі масавых мерапрыемствах 25 і 26 сакавіка. Супрацоўнікі міліцыі затрымалі Паўла 26 сакавіка і даставілі ў РАУС, дзе на яго быў складзены пратакол аб адміністрацыйным правапарушэнні па арт. 23.34 КаАП. У аддзяленні міліцыі праваабаронцу стала дрэнна з сэрцам, і яму выклікалі хуткую. Затым Левінава змясцілі ў ізалятар часовага ўтрымання, дзе стан яго здароўя пагоршыўся, пасля чаго праваабаронцы шпіталізавалі.

Судзілі мужчыну завочна, так як Левінаў падчас суду знаходзіўся ў лякарні за межамі Рэспублікі Беларусь. Павел абскардзіў рашэнне раённага суда, аднак адмены або змены пастановы не дамогся: на днях Віцебскі абласны суд пакінуў прынятае рашэнне ў сіле.

Праваабаронцу затрымалі увечары 5 траўня ў доме яго брата ў вёсцы Нерэйшэ Сенненскага раёна, пасля чаго адправілі ў ізалятар часовага ўтрымання УУС па Віцебскай вобласці для адбыцця адміністрацыйнага арышту.

Левінаў паведаміў сваім калегам па тэлефоне, што падчас затрымання да яго не ўжывалі спецсродкі і фізічную сілу, а ён не аказваў супраціву супрацоўнікам міліцыі. Таксама праваабаронца дадаў, што на дадзены момант у яго сур'ёзныя праблемы са здароўем і на 11 мая ў яго прызначаная тэрміновая хірургічная аперацыя.

Прадстаўнік Беларускага Хельсінскага Камітэту ў Віцебску і Віцебскай вобласці Павел Левінаў з'яўляўся ўдзельнікам сотняў судовых спраў, грамадскіх дзеянняў па абароне правоў і свабод асоб, якія сталі ахвярамі рэпрэсій і свавольства ўладаў. За сваю дзейнасць неаднаразова падвяргаўся пераследам з боку ўладаў, у тым ліку адміністрацыйным штрафам і арыштам. У знак пратэсту трымаў дзьвух-, адзінаццаці- і чатырнадцацісутачныя галадоўкі.