Узнагарода "Знак імя Віктара Івашкечіва" быў заснаваны Партыяй БНФ у гонар аднаго з кіраўнікоў арганізацыі. З 2014 года штогадова ім узнагароджваецца чалавек, які па меркаванні Сойму партыі (вышэйшы кіраўнічы орган) на працягу года адзначыўся правядзеннем найбольш важных грамадска-палітычных або патрыятычных акцыяў. У папярэднія тры гады ўладальнікамі знаку станавіліся актывісты сталіцы, але ў гэтым годзе за кошт прайшоўшых "Маршаў недармаедаў", якія былі найбольш масавымі ў рэгіёнах, у спіс намінантаў узнагароды патрапілі і двое немінчанаў.

Упершыню ў спіс намінантаў патрапіў і прадстаўнік Оршы. Такім чынам была адзначана самая масавая акцыя пратэсту ў нашым горадзе з 1991 года. Оршу ў спісе намінантаў прадставіў рэдактар нашага сайту Ігар Казмерчак, які перад акцыяй і пасля яе патрапіў пад моцны прэсінг сілавых структураў (вобшукі на мяжы і ў офісе, затрыманне, штраф і г.д.), але працягнуў працу.

Патрапленне ў спіс намінантаў "Знака імя Віктара Івашкевіча" значная падзея, якая спрыяе росту аўтарытэта кожнай з вылучаных асобаў і прыцягвае ўвагу да тых акцыяў, за якія людзі былі ўзнагароджаны. Хаця традыцыя ў гэтым годзе зноў не змянілася - сярод сямі намінантаў для ўзнагароды была абрана мінская актывістка Ніна Багінская, пажылая жанчына, якая на шмат якіх акцыях першай узнімала нацыянальны бел-чырвона-белы сцяг, а таксама выходзіла на адзіночныя пікеты пратэсту, не зважаючы на вельмі паважны ўзрост.