Пакуль аднавіць нармальную вытворчасць на Аршанскім ільнокамбінаце не атрымліваецца. Працэс аднаўлення пакуль ідзе не тым чынам, які прадугледзелі ўлады. Аршанскі ільнокамбінат займае 8% сусветнага рынку тэхнічных і бытавых тканінаў са льна, але калі своечасова не праводзіць захады па мадэрнізацыі прадпрыемства, доля можа ўпасці. Працэс абнаўлення абсталявання льнозаводаў зайшоў у тупік, пра гэта піша газета "СБ", спасылаючыся на словы старшыні Камітэту дзяржаўнага кантролю Леаніда Анфімава. Той адзначыў, што заводы па-ранейшаму атрымоўваюць кароткае валакно.
- Пасля завяршэння мадэрнізацыі камбінату спатрэбіцца вялікая колькасць якаснага валакна. На такім сыравіну, якое льнаводы пастаўляюць сёння, абноўлены Аршанскі льнокамбінат эфектыўна працаваць не зможа.
Кожная чацвёртая тона валакна ў краіне - віцебская. У рэгіёне працуе найбольшая колькасць ільнозаводаў - 9. Тут размешчаны 12 льнасеяльных гаспадарак і Інстытут ільну. Прэтэнзіі перапрацоўшчыкаў адрасаваныя перш за ўсё тым, хто вырошчвае лён і атрымлівае валакно. Асабліва папулярнае пытанне: а ці заўсёды аб'ектыўныя спасылкі льнаводаў на надвор'е? Дырэктар ААТ "Віцебсквабллён" Таццяна Ярома ў адказ на гэта прывяла факты:
- Палова тэхнікі для сяўбы і ўборкі лёну ў Віцебскай вобласці мае знос звыш 80 адсоткаў, з 105 трактароў 71 куплялі ў 1988 - 2006 гадах. З 9 льнозаводаў у галіне мадэрнізаваны толькі 2. З 12 тэхналагічных ліній па выпрацоўцы доўгага льновалакна 8 зношаныя на 100 адсоткаў. 82 адсоткі абсталявання для кароткага валакна працуе 27 гадоў, гэта - двайны тэрмін.
А яшчэ лён сёння самая нявыгадная культура для апрацоўкі: на трэсце з гектара можна зарабіць 881 рубель, на цукровых бураках 3.216 рублёў, на бульбе - 10.200. Пры гэтым лён - культура вельмі працаёмкая, і ён неабходны высокай якасці.
Крыўдна мець найноўшае абсталяванне на ільнокамбінаце і закупляць для яго імпартны лён. 27-га кастрычніка Леанід Анфімаў наведваў Аршанскі ільнокамбінат. Высновы пасля новага візіту пакуль не вядомыя.
