Аршанец Сяргей Шыбека пераехаў у Магілёў на пастаяннае месца жыхарства. Ён уладкаваўся кіроўцам на завод "Строммашына", дзе яму далі няспраўную фуру. Мужчына пачыніў яе, давёў да ладу і пачаў дастаўляць грузы па ўсёй краіне. Але за некалькі месяцаў працы зарплата не павышалася. Шыбека атрымліваў 3,5 мільёны рублёў.

Сам ён сказаў, што на старым месцы працы ў роднай Оршы зарабляў бы больш. "Калі пераязджаў у Магілёў, то не думаў, што ў абласным цэнтры буду атрымліваць менш, чым у Оршы. Калі б я застаўся на сваім старым працоўным месцы, то зарабляў бы не меней за 5 мільёнаў", - цытуе словы Шыбекі "Наш Магілёў". Кантракт быў заключаны на год, і да яго заканчэння прадпрыемства не захацела звальняць кіроўцу. Сяргей Шыбека зразумеў марнасць адзіночнага змагання ды звярнуўся ў незалежны прафсаюз Радыёэлектроннай прамысловасці. У прафсаюзе дапамаглі і словам, і справай. У выніку работнік быў звольнены па 41-м артыкуле Працоўнага кодэксу, да заканчэння тэрміну кантракту. Ён атрымаў сярэдні заробак за тры месяцы і выплату на два тыдні.

Высветлілася, што прадпрыемста не плаціла своечасова зарплату і адпускныя, не падтрымлівала ў гаражах неабходную тэмпературу паветра, а таксама ўзімку часта адсутнічала гарачая вада. Больш за тое - нават не выдавалася спецадзенне. Калі Шыбека звярнуўся ў незалежны прафсаюз, прадпрыемства ўжо само прапанавала разарваць кантракт па агульнай згодзе. Але кіроўца пайшоў на прынцып.

Як кажа юрыст незалежнага прафсаюзу, скарга ў КДБ ужо дала вынік - юрыст завода будзе прыцягнута да адміністратыўнай адказнасці. Таксама як і загадчыца канцылярыі, якая па загадзе юрыста не выдавала Шыбеку кнігу скаргаў, а таксама не прымала заяваў. За парушэнне працоўнага заканадаўства і несвоечасовую выплату заработнай платы дырэктар "Строммашыны" Ануфрыенка атрымаў некалькі спагнанняў. Пакараны штрафам і начальнік транспартнага цэху Кірсанаў за парушэнне заканадаўства па ахове працы.