"Кірмашы праэктаў" кампанія "Будзьма Беларусамі" і грамадская арганізацыя "Sympa" праводзяць па ўсёй краіне. Сутнасць гэтых мерапрыемстваў у тым каб жыхары населеных пунктаў самі выказвалі ідэі, якія могуць палепшыць сацыяльна-культурную прастору гарадоў. Не малаважны фактар у кірмашы і рэалізуемасць гэтых ідэяў. У Оршы "Кірмаш" прайшоў 18 красавіка. На ім былі агучаныя пяць ідэяў:

1. Фестываль рухомых гульняў. У сёняшняй сітуацыі, калі дзеці зашмат часу надаюць розным гаджэтам з кампутаровымі гульнямі, актывісты прапаноўваюць праводзіць штогадовы культурна-спартовы фестываль разлічаны на дзяцей і моладзь. Фестываль мог бы не толькі браць усім вядомыя гульні, але і паспрабаваць аднавіць старажытныя беларускія забавы. У прынцыпе такі фестываль у мінімалістычным выглядзе ўжо праходзіць на працягу двух гадоў ва ўрочышчы Куцеенкі, але яго масштабы з-за адсутнасці сродкаў даволі сціплыя.

2. Арт-прастора. У многіх вялікіх гарадах сёння існуюць арт-прасторы - гэта альтэрнатыўныя грамадска-культурныя ўстановы, якія на простых умовах прадстаўляюць сваё памяшканне для правядзення культурніцкіх і грамадскіх мерапрыемстваў. Вакол такіх прастораў звычайна фармуюцца творчыя супольнасці. Ідэя тым больш актуальная для Оршы, бо мясцовы аддзел культуры забараняе шмат мерапрыемстваў.

3. Орша-сталіца новага віду спорта. Гульня "Квадрат" шырока вядомая і ў нашай краіне і за яе межамі, але ніколі ніхто да яе не ставіўся як да патэнцыйнага віда спорта. У ОРшы ж прапануецца правесці першы чэмпіянат свету па "Квадрату". Ідэя была агучана яшчэ ў мінулым годзе і за гэты час ініцыятары змаглі дамовіцца з некаторымі патэнцыйнымі спонсарамі і некаторымі ўдзельнікамі з іншых краінаў. Работа працягваецца.

4. Бізнэс-школа для пачаткоўцаў. Некалькі маладых бізнэсоўцаў прапанавалі адкрыць у Оршы не стандартную бізнэс-школу. Навучанне ў ёй павінна быць бясплатнае і па сістэме "роўны вучыць роўнага", школа будзе навучаць не столькі тэорыі, колькі дапамагаць людзям на практыцы вырашаць пытанні ад рэгістрацыі сваёй справы да яе развіцця. Канчатковая задача школы - не проста стварэнне некалькіх бізнэс-праэктаў, а ў стварэнні прадпрымальніцкага кластэра з удзельнікаў навучання - каб прадпрымальнікі не канкуравалі адно з адным, а ўзаемадапаўнялі.

5. Фестываль усяго ў Балбасава. Старая частка балбасаўскага аэрадрому сёння амаль не выкарыстоўваецца, хаця мае вялікую прастору на якой можна было б праводзіць усё што заўгодна. Мясцовыя жыхары прапануюць скарыстаць гэтую прастору для арганізацыі культурніцкага фестывалю.