Кліентамі і рабаўнікамі сталі 2 жыхара Калінкавічаў. Першы 34-гадовы мужчына, раней быў неаднаразова судзімы, а ў гэты дзень вызваліўся з аршанскай калоніі №8, дзе адседзеў два гады за крадзёж. Другі кліент - яго 28-гадовы сябра, таксама раней судзімы за рабаўніцтва і крадзяжы, які прыехаў у Оршу сустракаць прыяцеля.
Пасля ўжывання алкаголю госці нашага гораду вырашылі паехаць у родныя Калінкавічы з раскошай - на таксі. Пра кошт з таксістам дамовіліся загадзя - 2.000.000 рублёў, паабяццалі аддаць грошы па прыезду. У час паездкі п'янка працягвалася з прыпынкамі ў прыдарожных кавярнях. У выніку, грошы скончыліся яшчэ да прыезда ў Калінкавічы.
У таксіста пазычылі 100.000, на якія былі куплены кветкі (у вызваленага пакуль ён быў у вязніцы памерла маці), каб ускласці на магілу, тут жа ўзялі ў таксіста і мабільны тэлефон. Гэтага падалося мала, захацелася сапраўднага свята і пасажыры зноў папрасілі пазычыць, каб паехаць да сястры аднаго з іх на дзень народзінаў. На гэты раз таксіст адмовіўся пазычаць, але кліентаў гэта не спыніла: малодшы забраў у таксіста з бардачка 230.000, а старэйшы выцягнуў кіроўцу з-за стырна і сам сеў кіраваць машынай. П'яная паездка была нядоўгай - прыпынак быў каля бліжэйшай крамы. Тут п'яны за стырном ледзь не збіў пешахода і прыпаркаваўся так, што заблакаваў іншы аўтамабіль. Пакуль рабаўнікі ругаліся з пешаходам і пасажырамі заблакаванага аўтамабіля, да месца паспеў таксіст. Пасля кароткага тлумачэння сітуацыі, пасажыры заблакаванага транспарту вызваліся дапамагчы таксісту і затрымалі рабаўнікоў, утрымліваючы іх да таго часу пакуль не прыехала міліцыя.
