Набліжаецца турыстычны сезон і тур.фірмы актывізавалі рэкламу сваіх прадуктаў. Для расейскіх турыстаў прапаноўваюцца, ў тым ліку, і туры ў наш горад. Нечакана, але туры ў Оршу каштуюць даражэй чым, нават, у праслаўленыя санаторыі краіны.
Так, у сакавіку тур на дваіх чалавек у ТАК "Орша" каштаваў 2.670 расейскіх рублёў на дзень (далей усе кошты пададзеныя ў пераразліку за адзін дзень). Для параўнання ў санаторыі "Беларусачка" ў красавіку тур на дваіх каштуе 1.718 расейскіх рублёў за дзень.
У чэрвені ў Оршы адпачынак будзе каштаваць 2.830 расейскіх рублёў, у санаторыі "Нарач" напрыканцы траўня - 2.080, у санаторыі "Буг" - 2.333, у "Беларусачцы" - 2.400.
Атрымліваецца, што ў Оршы сярод іншых прапановаў адпачынак найбольш дарагі, але гэта апраўдана. Па-першае, у кошт не ўваходзіць праезд, а да Оршы дабрацца танней і прасцей чым у іншыя санаторыі. Па-другое, у кошт адпачынку ўваходзяць лячэбныя працэдуры, у іншых санаторыях за іх не рэдка даводзіцца даплочваць. І самы вялікі бонус - для гасцей Оршы прапаноўваецца 5-разовае харчаванне, тады як у іншых санаторыях і дамах адпачынку або 3-разовае, або 4-разовае.
