Орша, Грамадства

Вялікдзень: Хрыстос уваскрос!

20.04.2014 01:01

3598 праглядаў, 1 каментар

20 красавіка Вялікдзень адзначаюць праваслаўныя і каталіцкія вернікі.

Ва ўсіх праваслаўных і каталіцкіх храмах прайшлі святочныя набажэнствы, гучалі сімвалічныя словы: Хрыстос уваскрос! Яны сімвалізуюць перамогу жыцця над смерцю, дабра над злом, усяляюць веру ў будучае. Вялікдзень – не проста свята, гэта сутнасць хрысціянства. З такімі думкамі прыйшлі шматлікія аршанцы ў храмы, каб памаліцца, запаліць свечкі нязгаснага агню, асвяціць традыцыйныя стравы святочнага стала – фарбаваныя яйкі і кулічы. Так, пасля самага доўгага хрысціянскага паста хрысціяне па традыцыі накрываюць багатыя на прысмакі святочныя сталы, галоўнымі стравамі на якіх з”яўляюцца пасвяцоныя фарбаваныя яйкі і кулічы. Сёння многія гаспадыні ўжо самі не пякуць пасхальныя булкі і кулічы, іх можна набыць у магазінах. Дарэчы, ва ўсіх гандлёвых прадпрыемствах Аршаншчыны аформлены спецыяльныя куткі з велікоднымі таварамі, у шырокім асартыменце прадстаўлены кулічы розных памераў і на любы густ, тварожныя пасхі, пірагі, булкі. Напрыклад, толькі ў магазінах “Алмі” і “Закрама”, дзе ёсць свае пякарскі і кандытарскі цэхі, вырабілі каля 6000 велікодных кулічэй. Але дыятолагі перасцярагаюць у застоллі не вельмі налягаць на тлустыя мясныя, рыбныя, пячоныя прысмакі, спіртныя напоі, асабліва тым, хто пасціўся, каб не нашкодзіць здароўю. Трэба памятаць, што Вялікдзень – гэта свята, у першую чаргу, высокай духоўнасці. Хрыстос уваскрос!