Газета "Сокрытое Сокровище" выдаецца расейскай царквою Адвентыстаў сёмага дня. Яна мае на мэце пропаведзь Бібліі і хрысціянства ўвогуле, канешне, з тлумачэннем вучэння Адвентыстаў. Але ў 2015 годзе ў Беларусі газета стала скандальна знакамітай пасля публікацыяў палітызаваных артыкулаў на сваім сайце, у тым ліку, у падтрымку Луганскай народнай рэспублікі. З таго часу беларуская царква Адвентыстаў адмовілася закупаць палітызаваную царкоўную газету. Але не надоўга.
У 2018 годзе газета зноў пачала з'яўляцца ў Беларусі пра што нам паведамілі самі вернікі-адвентысты. Прычым сутнасць газеты не змянілася. У чэрвеньскім выпуску "Скрытого Сокровища" апублікаваны артыкул "Расія і ЗША: прычыны супрацьстаяння". Артыкул за аўтарствам Наталлі Варонінай напісаны ў лепшых традыцыях канспіралогіі, кшталту дакументальных фільмаў канала РЭН-ТВ. Спачатку аўтарка выказвае меркаванне, што каталіцкая царква - гэта царква д'яблы. А потым абвінавачвае ЗША, што тыя дапамагаюць каталіцызму. А дэмакратыю і талерантнасць прапаведніца адвентыстаў называе рогамі д'ябла. І, канешне, у канцы артыкула пахвала Расеі. Праўда, моцна нахваліць сваю дзяржаву не атрымалася - у артыкуле толькі адна фраза пра Расею: Расея адмаўляецца дзейнічаць па амераканскім сцэнары.
Насамрэч, такое дзіўна чытаць у газеце Адвентыстаў, бо царква гэтая змагла ўзнікнуць у ЗША менавіта дзякуючы дэмакратыі і рэлігійнай талерантнасці. Затое ў Расіі ад моманту з'яўлення (1880 год) да амаль 1990 адвентысты падвяргаліся ганенням: забаронам, ссылкам, растрэлам, судам, кантроль КДБ, вярбоўка вернікаў, правакацыя расколаў і г.д.
