У цэнтры Оршы няма дзе набыць прадукты пасля 22 гадзін. У свой час адказныя за рэжым працы крамаў настойвалі на тым, каб не засталося кругласуткавых кропак. Гэта рабілася дзеля таго, каб пазбегнуць начных загулаў п'яных людзей, скандалаў і крымінальных дзеянняў. Простай забаронай на продаж алкагольных вырабаў на ноч не абмежаваліся, вырашылі "прыкрыць" кругласуткавыя крамы. Прычым зрабілі гэта так "надзейна", што цяпер пасля 22:00 у цэнтры Оршы нельга купіць нават булкі хлеба - крамы зачынены.
"Рублёўскі" (былая "Ніка"), які знаходзіцца насупраць Гарадского цэнтра культуры, зачыняе дзверы а 22:00.
"Коопмаркет" (насупраць педагагічнага каледжа) спыняе працу а 21-й гадзіне.
"Мерком" № 4 (былы "Купец") зачыняе дзверы а 22-00
Крама "Жар-птушка", што знаходзіцца побач з райаддзелам міліцыі, увогуле зачыняецца а 20-й, калі некаторыя аршанцы толькі сканчваюць працаваць!
Калі прайсці па вуліцы Леніна далей, то з'яўляецца надзея: крама "Пасад" (раней крама №6) сустракае аптымістычнай шыльдай "24 гадзіны". Але якое там! Кругласуткавай працы і блізка няма, адчыняецца яна а 8-й, а спыняе дзейнасць а 22-й. Тым не менш шыльда "24 гадзіны" не прыбіраецца ўжо доўгі час. Хаця раней "Пасад" абыходзіўся без яе, што адлюстравана на фота да дадзенага матэрыялу. Тады хоць не ўводзілі ў зман пакупнікоў.
Адсюль маем, што ў цэнтры Оршы няма магчымасці набыць прадукты познім вечарам. Няўжо складана зрабіць хоць адну краму з рэжымам хаця б да 23:00?
