Прэзідэнт прыняў новыя кадравыя рашэнні 31 жніўня. Не абыйшлося без узгадвання аршанскага "разносу" чыноўнікаў пасля чаго некаторыя афіцыйныя асобы страцілі свае крэслы. Амаль трэцюю частку артыкула пра кадравыя рашэнні прэзідэнта яго прэс-служба распавядае пра тое, што некаторыя чыноўнікі страцілі свае пасады... з-за п'янства.

"Публічна хачу сказаць пра недапушчальнасць п'янства. Сне сорамна было пра гэта гаварыць, але многія кіраўнікі, якіх я адправіў нядаўна (відавочна маецца на ўвазе звальненні пасля наведвання Оршы - рэд.) за каўнер закладалі прыстойна" - цытуе прэс-служба. Але пытанне п'янства тычыцца не толькі ўжо звольненых чыноўнікаў: "Але тое, што тычыцца п'янкі, вы павінны ведаць сваю меру, вы павінны ведаць, з кім, дзе і колькі, як у народзе гавораць. Калі вы гэтае пачуццё губляеце - вы не кіраўнік. І вось па гэтай прычыне нам давядзецца з некаторымі ў бліжэйшы час развітацца." Кіраўнік дзяржавы, апісваючы п'янства сваіх чыноўнікаў казаў пра рэчы, якія, хутчэй, можна ўявіць, хутчэй, апісваючы паводзіны нізкааплочваемых работнікаў, або безпрацоўных, а не міністраў: "П'яніца - гэта не кіраўнік. Калі ён сёння напіўся да страты пульса, і гэта праз дзень ці кожны дзень, ён заўтра не работнік. Ён ходзіць і думае, як бы дзе пахмяліцца".

Праўда, хто канкрэтна са звольненых так моцна піў, што шукаў дзе пахмяліцца прэзідэнт не сказаў. Назваў толькі былога міністра энэргетыкі, які "напіўшыся не прыходзіць на работу". Затое сказаў, што ўсе звольненыя павінны атрымаць іншыя пасады.