Увосень па Оршы хадзілі міліцэйска-ваенныя патрулі, пад'ём з руін і попелу вырашылі рабіць сілавым спосабам. Пра вынікі мала што вядома, але для нашага горада ўзмацненні не прайшлі. Зрэшты, цяпер набліжаюцца святы, таму чарговыя меры яшчэ можна зразумець, тым больш яны ўжываліся і раней. Асабісты склад органаў унутраных спраў Віцебскай вобласці ў калядныя і навагоднія святы перавядуць на ўзмоцнены варыянт нясення службы. Пра гэта паведаміў на пасяджэнні камісіі па надзвычайных сітуацыях намеснік начальніка міліцыі грамадскай бяспекі УУС Віцебскага аблвыканкама Вячаслаў Грышчанка, перадае карэспандэнт БЕЛТА. Па словах прадстаўніка УУС, міліцыя Віцебскай вобласці гатова да забеспячэння парадку ў маючыя адбыцца святы і калядныя набажэнствы.
Для своечасовага рэагавання на змену становішча, а таксама для кіравання сіламі і сродкамі тэрытарыяльных падраздзяленняў прадугледжана функцыянаванне аператыўна-сітуацыйных штабоў, узмоцненых следча-аператыўнымі службамі. "Для забеспячэння правапарадку будуць задзейнічаны супрацоўнікі органаў унутраных спраў і ваеннаслужачыя ўнутраных войскаў. Улічваючы масавасць мерапрыемстваў, адмысловая задача стаіць па забеспячэнні грамадскага парадку ў Віцебску, Полацку, Оршы і Наваполацку. Акрамя таго, з 24 па 26 снежня, з 31 снежня па 2 студзеня , а таксама з 6 па 8 студзеня асабісты склад органаў унутраных спраў Віцебскай вобласці будзе пераведзены на ўзмоцнены варыянт нясення службы", - адзначыў Вячаслаў Грышчанка.
Таксама ён прапанаваў зачыніць лядовыя каткі на плошчы Перамогі ў Віцебску 21 і 31 снежня, а таксама 1 студзеня ў пазбяганне траўматызму падчас масавых гулянняў. Намеснік старшыні аблвыканкама Уладзімір Белавус скептычна паставіўся да гэтай ідэі і даручыў дапрацаваць праект рашэння камісіі. Спецыялісты з розных службаў і ведамстваў будуць правяраць наяўнасць неабходных дакументаў на продаж піратэхнічных вырабаў, кантраляваць, ці надзейна ўстаноўлены елкі, з якіх матэрыялаў яны зроблены, ці бяспечна падключана ілюмінацыя, у якім стане праводка.
У святочныя дні брыгады хуткай медыцынскай дапамогі будуць працаваць у рэжыме павышанай гатоўнасці. Спланавана стварэнне шасці дадатковых рэзервовых брыгад у Віцебску, па чатыры ў Оршы, Полацку і Наваполацку і па адной у райцэнтрах вобласці. Таксама павялічаць колькасць ложкаў у бальніцах.
