Адбылося ўрачыстае адкрыццё лінейнага цэнтра транспартнага абслугоўвання "Орша" (далей - Цэнтр) на чыгуначнай станцыі "Орша-Усходняя". Сучасны тэмп развіцця тэхналогій у сферы транспарту і лагістыкі патрабуе адпаведнага матэрыяльна-тэхнічнага абсталявання. Адкрыццё Цэнтра дало магчымасць усім удзельнікам знешнеэканамічнай дзейнасці, у тым ліку прадстаўнікам бізнесу, супрацоўнікам чыгункі і мытных органаў, ажыццяўляць поўны спектр лагістычных паслуг на чыгуначнай станцыі з мінімальнымі выдаткамі.
У рамках стварэння лінейнага цэнтра сучасны выгляд набыў пункт мытнага афармлення "Орша-Усходняя" (далей ПМА), піша сайт Віцебскай абласной мытні. На дадзены момант ПМА абсталяваны сучаснай камп'ютэрнай тэхнікай, сродкамі сувязі, відэаназіраннем і памяшканнямі, неабходнымі для бесперашкоднага ажыццяўлення мытных аперацый і мытнага кантролю.
Стварэнне сучаснага цэнтра ў г.Оршы звязана з перспектывамі развіцця Аршанскага чыгуначнага вузла ў цэлым, а таксама з ростам аб'ёмаў перавозак грузаў, у тым ліку паскоранымі кантэйнернымі цягнікамі ў адрас мультымадальнага прамыслова-лагістычнага комплексу "Балбасава".
