На фоне цяжкіх і пакуль бясплённых перамоваў паміж Аляксандрам Лукашэнкам і прэзідэнтам Расейскай Федэрацыі з'яўляюцца новыя паказнікі няпростых стасункаў. На шэрагу публічных старонак і суполак у сацыяльных сетках, выкупленых расейцамі, былі праведзеныя апытанні "на мяжы фолу", ці хочуць беларусы "ўз'яднання", а на справе паглынання ўсходнім суседам? Цяпер узрастае напружанне на мяжы. Летась расейцы ўвялі пашпартны кантроль на сваёй мяжы — пры ўездзе ў Расею на аўтобусе ў беларусаў глядзелі наяўнасць пашпарту, стала немагчымым трапіць на тэрыторыю РФ грамадзяніну іншай краіны. У той жа час Беларусь не арганізавала ніякіх пунктаў пропуску са свайго боку, адпаведна на нашу тэрыторыю маглі трапляць нелегалы і людзі з пашпартамі, адрознымі ад беларускага ці расейскага.
Цяпер памежнікі сталі патруляваць міжнародныя цягнікі, прычым здарылася гэта з абодвух бакоў без апавяшчэння пасажыраў. Пра патрулі памежнай службы як з беларускага боку, так і з расейскага заявіў у сваім твітэры вядомы менскі блогер Антон Матолька:
«В поезде Москва-Минск ходят пограничники - и с той, и с другой стороны. Ещё не граница, но уже и не её отсутствие.
Раньше только российские были, да, и то только когда в Москву едешь. Чтоб ИЗ Москвы - впервые вижу.»
У адказах да гэтага допісу з'явіліся словы адной з карыстальніц:
Электрички Орша-Красное (Смоленская обл). Пограничники тоже проверяют, если ещё полгода назад можно было без паспорта проскочить. Теперь обязательно паспорт у каждого.
Афіцыйнага адказу на гэта ад памежных службаў як Беларусі, так і ўсходніх суседзяў пакуль няма. Нагадаем, што раней грамадзяне Беларусі, у прыватнасці аршанцы, маглі свабодна набыць квіток на электрычку да Краснога, а затым да Смаленску без прад'яўлення пашпарту, тое самае дзейнічала і ў адваротны бок. Натуральна, можна было нарвацца на пашпартную праверку з боку расейскай міліцыі (якая затым была пераназваная ў паліцыю), аднак у Смаленску гэта было вялікай рэдкасцю. Акрамя таго, паводле дамовы так званай Саюзнай дзяржавы ад 24 студзеня 2006 года, адрэдагаванай 3-га сакавіка 2015 года, беларусы могуць знаходзіцца ў РФ неабмежаваную колькасць часу, а першыя 90 дзён нават не абавязаныя рэгістравацца.
Цяпер на агульнай мяжы становіцца больш кантролю. Адсутнасць памежных пунктаў і праверкі дакументаў раней выклікала крытыку ўладаў з боку апазіцыйных структураў. Гэта адбывалася ў асноўным праз тое, што мяжа з Расеяй самая напружаная для Беларусі адпаведна з колькасцю кантрабанды, якую спрабуюць завезці праз яе. Пакуль складана сказаць, што азначаюць дадатковыя праверкі памежнікаў у цягніках.
