У свае 29 год аршанец меў ужо даволі насычаную біяграфію: крыміналка за крадзёж з працы мабільніка, частыя змены работы на такіх пасадах як грузчык, ахоўнік і адміністратыўныя пакаранні за розную драбязу. Пры гэтым мужчына быў яшчэ і азартным гульцом - шмат грошай прасоджваў у казіно.
Яшчэ ў 2015 годзе ён пазычыў грошы ў брата сваёй жонкі быццам бы на пачатак бізнэсу. Паводле легенды, мужчына пазычыў каб з'ездзіць у Расію, купіць там аўтамабілі і перапрадаць у Беларусі. Родзіч пагадзіўся дапамагчы, а атрымаўшы грошы падманшчык паехаў не ў Расію, а ў Мінскае казіно дзе лёгка прасадзіў усё пазычанае. Перад братам сястры трэба было неяк патлумачыцца і тады мужчына, гуляючы па Мінску, пафоткаў некалькі дарагіх аўто, якія і выдаў за прывезеныя для бізнэсу.
Пазней працуючы ахоўнікам у гандлёвым цэнтры Мінска ён паліваў у вушы такім жа ахоўнікам, што мае мэблевы бізнэс, які вядзе разам з ужо названым братам жонкі. Той сапраўды меў бізнэс у сталіцы. У ахоўнікаў мужчына пачаў пазычаць грошы на развіццё мэблевага бізнэсу, абяццаючы вярнуць усё калі выдуманыя продажы вырастуць. У якасці падцверджання сваёй хлусні таксама дапамаглі фотаздымкі, фотаздымкі мэблі якой гандляваў родзіч.
За тры гады і жончынаму брату і калегам-ахоўнікам надакучыла чакаць вяртання пазычанага і яны звярнуліся ў міліцыю. Аказалася, што агулам мужчына паспеў пазычыць 54.000 даляраў ЗША. Грошы гэтыя, канешне, ні ў які бізнэс не пайшлі, дакладней, пайшлі яны ў гульнявы бізнэс - усе іх махляр прайграў у казіно. Цяпер супраць ліпавага бізнэсмэна заведзена крымінальная справа, яму пагражае да 10 гадоў турэмнага зняволення.
